ప్రపంచ ఆరోగ్య సంస్థ (డబ్ల్యూహెచ్ఓ) నుంచి వైదొలుగుతున్నామని అమెరికా అధికారికంగా ప్రకటించింది. ఈ మేరకు ఐక్యరాజ్య సమితి ప్రధాన కార్యదర్శి ఆంటోనియో గుటెర్రస్కు ట్రంప్ ప్రభుత్వం తెలియజేసింది. ఈ నిర్ణయం 2021 జులై 6 నుంచి అమల్లోకి రానుందని అమెరికా విదేశాంగ శాఖ తెలిపింది.
అమెరికా ఉపసంహరణకు సంబంధించి డబ్ల్యూహెచ్ఓ నిబంధనలను గుటెర్రస్ పరిశీలిస్తున్నట్లు ఆయన అధికార ప్రతినిధి స్టీఫెన్ డుజార్రిక్ తెలిపారు. డబ్ల్యూహెచ్ఓ షరతులకు అనుగుణంగా అమెరికా ప్రకటన ఉందా అనే విషయాన్ని ధ్రువీకరించే పనిలో ఉన్నట్లు వెల్లడించారు.
వైదొలగాలంటే ఎలా..
డబ్ల్యూహెచ్ఓ ఉపసంహరణ నిబంధనల ప్రకారం.. వైదొలిగే ఏడాది ముందు ఐరాసకు నోటీసు ఇవ్వాల్సి ఉంటుంది. ఉపసంహరణకు ముందే డబ్ల్యూహెచ్ఓకు అమెరికా ఇచ్చిన ఆర్థిక హామీలను నెరవేర్చాల్సి ఉంటుంది.
డబ్ల్యూహెచ్ఓకు 400 మిలియన్ డాలర్లతో అతిపెద్ద స్పాన్సర్గా ఉన్న అమెరికా.. ఇంకా 230 మిలియన్ డాలర్లు బకాయిలు చెల్లించాల్సి ఉంది. వీటితో పాటు 2020-21 కాలంలో స్వచ్ఛందంగా అందిస్తామన్న 650 మిలియన్ డాలర్ల హామీని నెరవేర్చాల్సి ఉంటుంది.
డబ్ల్యూహెచ్ఓకు బైడెన్ మద్దతు..
ప్రపంచ ఆరోగ్య సంస్థపై ట్రంప్ నిర్ణయాన్ని మాజీ ఉపాధ్యక్షుడు, డెమొక్రాట్ అభ్యర్థి జో బైడెన్ తప్పుబట్టారు. డబ్ల్యూహెచ్ఓకు పూర్తి మద్దతిస్తామని వెల్లడించారు. నవంబర్లో జరిగే ఎన్నికల్లో గెలిస్తే ఈ నిర్ణయాన్ని వెనక్కు తీసుకుంటామని తెలిపారు.
కరోనా వైఫల్యంతోనే..
కరోనా మహమ్మారి విషయంలో మొదటి నుంచి డబ్ల్యూహెచ్ఓపై విమర్శలు గుప్పిస్తోన్న అమెరికా అధ్యక్షుడు డొనాల్డ్ ట్రంప్.. ఆ సంస్థ నుంచి వైదొలుగుతామని మే నెలలో ప్రకటించారు. డబ్ల్యూహెచ్ఓతో పూర్తిగా తెగతెంపులు చేసుకుంటున్నట్లు స్పష్టం చేశారు.
కరోనా కట్టడిలో డబ్ల్యూహెచ్ఓ పూర్తిగా విఫలమైనందు వల్లే లక్షలాది మంది ప్రాణాలు కోల్పోయారని, చైనా చేతిలో సంస్థ కీలుబొమ్మలా మారిందని తీవ్ర ఆరోపణలు చేశారు ట్రంప్. చైనాలో మహమ్మారి విజృంభిస్తుందని తెలిసినా ప్రపంచ దేశాలను డబ్ల్యూహెచ్ఓ అప్రమత్తం చేయలేకపోయిందన్నారు.
ఇదీ చూడండి: అమెరికా-డబ్ల్యూహెచ్ఓ మధ్య అసలేం జరిగింది?
